Ag comhaireamh na suíocháin ... ar lean

Gan ach moladh ón Phortingéil agam, leanfaidh mé le m'obair.

An Lú.  Tuar:  FF-2 FG-2 (+1) SF-1.  Mar atá, ach amháin go mbeirfidh FG an suíochán nua leo.

De bharr gur toghadh Kirk mar Cheannchomhairle tá a shuíochán slán ach chomh maith le seo tá sé fógraithe ag an gCoimisiún um Thoghlaigh go mbeidh 5 suíochán i gContae an Lú amach anseo, rud a chiallaíonn go mbeidh ceithre suíocháin fós ar fáil.  Murach an titim tubaisteach i dtacaíocht FF bheadh seans mhaith acu 3 as 5 a bhaint amach, ach fé mar atá cúrsaí is dócha gur ag FG a bhéas an bua an chéad lá eile.

Longfort-Iarmhí.  Tuar:  FF-1 (-1) FG-2 (+1) LO-1.  Le titim vóta FF agus ardú vóta FG ba chóir go n-athróifidh suíochan ó cholún FF go cholún FG.

Ní féidir neamhaird iomlán a thabhairt áfach ar Sexton, ach fiú má tá vóta pearsanta aici agus farasbarr mór fágtha chuici ag Penrose, ní fhéadfainn an dara suíochán a fheiscint anseo don LO.

Luimneach Thiar.  Tuar:  FF-1 (-1) FG-2 (+1).  Arís, le h-athrú tacaíochta caithfidh na suíocháin athrú freisin.

Is dócha nach móran tacathóirí FF a chuireas tic i mbosca na Léinte Gorma, ach ní gá go ndéanfaidis.  Ní gá ach go bhfanfaidh dóthain acu sa bhaile ar an lá chun an dara suíochán a thabhairt do FG.  Níl aon páirtithe nó iarrathóirí eile san iomaíocht anseo.

Luimneach Thoir.  Tuar:  FF-2 FG-2 LO-1. Mar atá.

Tá vóta Dilín Ó Deamhas ró-ard anseo agus fiú leis an dtitim ollmhór atá le teacht do FF, bhí beagnach 3 cuóta acu an lá faoi dheireadh.  Beidh dhá ceann fós acu an chéad lá eile.  Ba chóir go mbeadh iarrathóir eile ag an LO sa rás anseo, ach fiú má bhíonn, beidh sé ró-dheacair an suíochán a bhaint ó FF an uair seo.

Laois-Uíbh Fháilí.  Tuar:  FF-3 FG-2. Mar atá.

Beidh Cowen slán anseo go deo na ndeor, sa chaoi is go bhfuil meas ag muintir Ghori ar Dzhugashvili fós.

Cill Dara Theas.  Tuar:  FF-1 (-1) FG-1 (+1) LO-1. Maraon le Luimneach Thiar, ní féidir le FF dhá suíochán as trí a bhaint amach le níos lú ná 40% den vóta.

Cill Dara Thuaidh.  Tuar:  FF-1 (-1) FG-1 LO-1 N-1 (+1). Bainfidh Murphy an dara suíochán ó FF anseo.

Bíonn sé fíor dheacair ar neamhspleáchaí dul in iomaíocht i gcoinne na bPáirtithe ach sa chás seo is iar-theachta í Murphy agus le titim i dtacaíocht FF, ba chóir go n-éireodh lei.

Ciarraí Theas.  Tuar:  FF-1 FG-1 LO-1 (+1).  Fillfidh Moynihan-Cronin agus is Rí na nGaimbín (nó a mhac, is dócha) a bhéas thíos leis. Tá'n vóta sin ag síor-ídiú ó 1997 i leith. Ní fhecfimid a leithéid ann arís.  Insh'allah. 

Ciarraí Thuaidh.  Tuar:  FG-1 LO-1 (+1) SF-1.  Beidh toradh eisceachtúil anseo, gan aon teachta FF seolta go Teach Laighin.

I dtaobh na ceithre páirtithe bhéinn ag súil le FG le 30% nó níos mó, FF le 25% nó mar sin agus SF & LO le 20% nó mar sin.  Ach beidh an 25% ag FF scartha idir beirt rud a fhágas Ferris slán agus áit do Mac an tEarraigh, nó Nia an tEarraigh ba cheart a rá.  An fadhb anseo do FF ná go bhfuil sluaite Foley agus McEllistrim in adharca a chéile le cianta agus blianta, agus fiú dá gcuirfí iallach ar cheachtar acu an fhód a fhágaint, is beag baol go ndéanfaidis, rud a scoiltfeadh an vóta ar aon nós.

Gaillimh Thiar.  Tuar:  FF-2 (-1) FG-2 (+1) LO-1.

Éinne atá ag tabhairt aird, feicfidh sibh cad atá déanta ansin agam.  Táim i ndiaidh Grealish a chomhaireamh mar theachta FF.  Tá'n suíochán sin, nó ceann an Fhathaigh b'fhéidir, caillte agus is an tSeanadóir a bhéas ann amach anseo.

Gaillimh Thoir.  Tuar:  FF-2 FG-2. Mar atá.

Is ait an dáilcheantar é seo mar níl páirtí ar bith ann seachas FF & FG.  Fiú le titim vóta FF, ní féidir liom 3 as 4 a thuar do FG.  Dá mbeadh aon saghas iarrathóir dáiríre ag LO nó SF fiú bheadh seans maith acu.

Sin é mar sin agus beagnach leath den tír feicthe againn.  Seo mar a sheasfas cúrsaí oíche an chomhaireamh:

FF-27 (-13) FG-35 (+7) LO-14 (+6) SF-3 (+1) N-1

Tabharfaidh mé aghaidh ar shuíocháin an phríomhchathair amárach.